Ese ni ibiruhuko koko?:Icyo abayobozi b’amashuri bavuga kuri kocingi itanezeza abana bayikorerwa.

 

2014-04-01 06:42:34

Nyuma y’uko tuganiriye n’abana ku kibazo bari bafite cyo kwigishwa amasomo y’inyongera(kocingi) , twaganiriye n’abayobozi banyuranye biganje mo abayobora amashuri maze batubwira uko icyo gikorwa gikorwa. Abayobozi bo mu Burasirazuba twabashije kuvugana  kuri telefoni batubwiko ayo masomo yitwa Kocingi bayatanga. Zimwe mu mpamvu zibatera gutanga ayo masomo, n’ubwo nabo bemera ko abangamira abana, n’imimerere-rusange iboneye y’uburezi, ngo: ni uko baba bafite ikipe yajonjowe mo abahanga  mu mwaka wa 6 w’amashuri abanza, iyo kipe ikongera kujonjorwamo abahanga mu gihe cyo kurangiza umwaka wa 3 muri cyiciro rusange. Ibyo rero ngo bibasaba gukoresha inzira zose, izishoboka n’izidashoboka. Ibyo babikora ngo barebeko muri abo bana n’ubwo bakuwemo ababahanga  incuro ebyiri zose barebeko nabo hari abababonekamo bakora neza mu bizamini bya Leta, nka babandi b’abahanga babakuwemo bakajyanwa mu mashuri y’indashyikirwa. Urugero wafata ruto, nk’ushinzwe amasomo mu ishuri rimwe ry’I Rwamagana  twabashije kuvugana yatubwiye ko muri iryo shuri bo badakoresha izo kocingi. Ikibibatera, ngo ni uko ba bafite abana b’indobanure. Ngo bituma  bigisha neza kandi bakarangiriza igihe badakoresheje kocingi. Ikindi ngo ni uko bana baba mu kigo bakoresha igihe cyabo neza kuruta  abana biga bataha. Mu mugi wa Kigali, abayobozi b’amashuri twaganiriye bafite iyi gahunda batugaragarije ko batabikoze ntacyo bageraho, gusa ngo bo bareka abana mu cyumweru cyambere kibanza cy’ibiruhuko bakabanza bakamira akuka. Ikindi kandi ngo n’abana batabashije kwishyura umusanzu basabwa,barabasonera, hari n’aho batagira icyo baka abana. Ngo iyi gahunda inafasha abana kutazerera mu gihe k’ibiruhuko. Abayobozi badakoresha iyi gahunda bemeza ko iyi myigire yo mu biruhuko ari mibi ndetse cyane kuko hari n’aho bihinduka ubucuruzi, kuruta uko biba ari uburezi. Aha hatunzwe agatoki ku mashuri abikora burigihe; atari ikibazo runaka cyagaragaye, ndetse ugasanga binakorerwa abanyeshuri batitegura n’ibizamini bya Leta. Ikigaragara ni uko abayobozi barenga 85% bakoresha ubu buryo bemeza ko ari uburyo bukoreshwa bugakemura ikibazo ,ariko akaba ataribwo buryo bwiza bwari bukwiye gukoreshwa. Abayobozi 15% mubo twaganiriye bagaragaje ko ibi atari byiza haba nagato; abana baba bakwiye kuruhuka nkuko byateganijwe, ngo uretse n’abana n’abarezi babo baba bakeneye kuruhuka. Ngo usanga n’ubundi mu itangira ry’ikindi gihembwe baza bananiwe ntibigishe neza. 

Tuzongera kugaruka kuri iyi ngingo tubageza ho icyo aba genzuzi b’uburezi  (Insipecteurs)babivugaho.